Manu Smruti Dahan Diwas

 మనుస్మృతి దహనం మనందరి కర్తవ్యం 

                                                      నాగటి నారాయణ 

       రావణ దహనం, కామ దహనం గురించి చాలామందికి తెలుసు. వాటి వివరాలు అంతగా తెలియక పోయినా ఆ కార్యక్రమాల్లో ఆనందంగా పాల్గొంటారు. వివరాలు తెలిస్తే వాటికి అంతటి ప్రాధాన్యత వుండదు. కానీ మనుస్మృతి దహనం గురించి తెలుసుకోవడం, ఆ కార్యక్రమాన్ని పెద్ద ఎత్తున నిర్వహించడం ఎంతైనా అవసరం. ముఖ్యంగా కేంద్రంలో మనుస్మృతి ఆరాధికుల అసాధారణ పరిపాలన సాగుతున్నందున ఈ కార్యక్రమాన్ని సామాజిక, రాజకీయ కర్తవ్యంగా నిర్వహించాలి. దళితుల పట్ల, మహిళల పట్ల సామాజిక వివక్షతకు మూలమైన సైద్ధాంతిక భావజాలాన్ని చెరిపేయాలనేది ఈ కార్యక్రమం యొక్క ఉద్దేశం. 1927 డిసెంబర్ 25 న మహారాష్ట్రలోని కొంకణ్ తీరప్రాంతంలో గల మహద్ గ్రామంలో వేలాదిమంది వలంటీర్ల సమక్షంలో డాక్టర్ బాబాసాహెబ్ అంబేద్కర్ మనుస్మృతి గ్రంధం ప్రతులను దహనం చేశారు. ఆ సందర్బంగా వారందరూ చేసిన ప్రతిజ్ఞ: "చాతుర్వర్ణ వ్యవస్థను విశ్వసించను. కుల వ్యత్యాసాలను అంగీకరించను. హిందూ సమాజానికి శాపంగా వున్న అంటరానితనాన్ని అంతం చేసేందుకు కృషి చేస్తాను. హిందువుల్లో ఆహారం,పానీయం విషయాల్లో ఎలాంటి నిషేధాలను పాటించాను. ఆలయాలు,నీటి వనరులు, పాఠశాలలు వగైరా సదుపాయాల విషయంలో అశ్ప్రుస్యులు అనబడే వారితోసహా అందరికీ సమాన హక్కులు వుంటాయని నమ్ముతున్నాను."  మనుస్మృతి గ్రంధాన్ని దహనం చేసే గుండం నలువైపులా ఎత్తుగా కట్టిన బ్యానర్లపైన మూడు నినాదాలు వ్రాశారు. అవి: మనుస్మృతి శ్మశానవాటిక; అంటరానితనం సమాధి; బ్రాహ్మణిజం ఖననం. శతాబ్ద కాలం గడుస్తుస్తున్నా ఆ మూడు నినాదాలు బ్యానర్లపైనా, కాగితాల పైనే వుండి పోయినవి. 

       మనుస్మృతి దహన కార్యక్రమంలో అంబేద్కర్ చేసిన అధ్యక్షోపన్యాసంలో "ఈ ఉద్యమం త్రాగు నీటి కోసం, ఆలయ ప్రవేశం కోసం మరియు యితర సదుపాయాల కోసమే కాదు, సమాజంలో అసమానతలకు హేతువైన వర్ణ వ్యవస్థను రూపుమాపడం కోసం చేస్తున్నాము" అని అన్నారు. ఆ కాలంలో ప్రపంచంలోని వివిధ దేశాల్లో సమాన హక్కుల కోసం జరుగుతున్న ఉద్యమాల విశేషాలను సభికులకు విడమర్చి చెప్పారు. ఫ్రెంచి విప్లవంలో పెల్లుబికిన మానవ హక్కుల డిమాండులను పేర్కొన్నారు. రోమ్ లో పార్టీసియన్సుకి వ్యతిరేకంగా ప్లెబియన్సు చేసిన తిరుగుబాటులోని డొల్లతనాన్ని వివరించారు. సమాజంలోని విభజన వ్యవస్థను అంతమొందించకుండా తమ గోడును వెళ్లబోసుకునేందుకు ఒక ట్రిబ్యూన్ ఏర్పాటు చేయాలనే డిమాండుతో ప్లెబియన్లు సాధించింది ఏమీ లేదని చెప్పారు. మౌలిక సమస్యలపై కేంద్రీకరించకుండా స్వల్పకాలిక, తాత్కాలిక సమస్యలకే పరిమితం కావడం వలన విముక్తి లభించదని బోధించారు. మా ఉద్యమాన్ని శాంతియుతంగా నిర్వహిస్తున్నాము, ఈ సామాజిక విప్లవానికి సహకరించండని అగ్ర వర్ణాలకు కూడా అంబేద్కర్ విజ్ఞప్తి చేశారు. శాస్త్రాలను వదిలేయండి, న్యాయాన్ని చూడండి అని హితవు పలికారు. మనుస్మృతి దహనం, మహద్ చెరువులోని నీరు తెచ్చుకోవడం సమస్య తీవ్రతను గుర్తింపచేసి, నిరసన వ్యక్తం చేసే సింబాలిక్ చర్యలు మాత్రమేనని, వాటి పరిష్కారానికి సుదీర్ఘ పోరాటం చేయాల్సి వుంటుందని అంబేద్కర్ దిశా నిర్దేశం చేశారు. 

       మనుస్మృతి వలన దళితులు అనుభవించిన అమానుష బానిసత్వం, సామాజిక అన్యాయం అందరికీ తెలిసిందే. దళితుల నివాసాలు ఉరికి కొద్ది దూరంలో వెలివాడలుగా వుండే విషయం ఇప్పటికీ షరా మామూలే. ఏదైనా పని మీద ఊళ్లోకి వచ్చే దళితుడి అడుగు జాడలు బజారులో పడకూడదు. అందుకోసం నడుముకు వెనక పొడవుగా గుబురుగా ఆకులు వుండే కొమ్మలను లేదా తాటి మట్టలను కట్టుకోవాలి. అవి వెనక నేలపై ఈడ్చుకొస్తూ పాదముద్రలను చెరిపేయాలి. ఊళ్ళో ఎక్కడా ఉమ్మి వేయకూడదు. అందుకోసం మెడలో చిన్న ముంత కట్టుకొని ఉమ్మి వచ్చినప్పుడు అందులోనే ఉమ్మాలి. దళితులు ఎలాంటి ఆయుధాలను వుంచుకోకూడదు, విద్య నేర్చుకోకూడదు, చదువుకోకూడదు. ఈ నియమాలను ఉల్లంఘిస్తే కఠినమైన శిక్షలకు, హత్యలకు గురికావాల్సిందే. స్వంతగా విలువిద్య నేర్చుకొన్న ఏకలవ్యుడి బొటనవేలును బలిగొన్న దుర్మార్గం ఒక ఉదాహరణ. దళితులతో పాటు ఏ వర్ణం వారైనా మహిళలు అందరూ మనుస్మృతికి బలి పశువులే. 

       'న స్త్రీ స్వాతంత్య్ర మర్హతి" అనేది మనుస్మృతి ఆదేశం. బాలికగా తండ్రి రక్షణలో, మహిళగా భర్త రక్షణలో, విధవగా కొడుకు రక్షణలో వుండాలని కట్టడి చేస్తోంది. శారీరక బలహీనులైనా సరే భర్తలు భార్యలను నిత్యం తమ అదుపులో వుంచుకోవాలని చెబుతోంది. మహిళలు అపవిత్రులు, అబద్దాలాడతారు, తెలివిలేని వారు, బలహీనులు ... అందువలన వారు వేదాలు చదవలేరు. కనుక వారు నామకరణం చేయడం, జాతకాలు చెప్పడం, వేద మంత్రోచ్చారణలు చేయడం వంటివి చేయకూడదని అంటుంది. మహిళలను బానిసలుగా చూసే ఇలాంటివి చాలా వున్నవి. ఇవి చాలవా మనుస్మృతిని మంటగలపడానికి? అగ్ర వర్ణాలు, అందులోని పురుషులకే మనుస్మృతి సర్వాధికారాలు కల్పించింది. బ్రాహ్మణ పురుషుడు బ్రాహ్మణ, క్షత్రియ, వైశ్య, శూద్ర కులాల మహిళలను పెళ్లి చేసుకోవచ్చు. అలాగే క్షత్రియ, వైశ్య పురుషులు తమ కులంలోని మరియు కింది కులాల్లోని మహిళలను పెళ్లి చేసుకోవచ్చు. కానీ శూద్ర కులం పురుషులు మాత్రం వారి కులంలోని స్త్రీలనే చేసుకోవాలి. ఏ కులంలోని పురుషులైనా తమకంటే పై కులంలోని స్త్రీలతో శారీరక సంబంధం కలిగితే అలాంటి వారు మరణ శిక్షార్హులవుతారు. ఇక దళితులను మనుషులుగానే చూడలేదు గనుక వారి హక్కులు గురించి మనుస్మృతి పూర్తిగా విస్మరించింది. 

       ఏ సామాజిక సమస్యల పరిష్కారం కోసం 93 సంవత్సరాల క్రితం అంబేద్కర్ నాయకత్వంలో మనుస్మృతి దహనం చేయబడిందో ఆ సమస్యలు యిప్పటికీ సజీవంగానే వున్నవి. అవి యింకా తీవ్రమవుతున్నవి కూడాను. దళితులపై దాడులు, దౌర్జన్యాలు పెరిగినవి. జాతీయ క్రైమ్ రికార్డ్సు బ్యూరో నివేదిక ప్రకారం బీహార్, మధ్యప్రదేశ్, ఉత్తర ప్రదేశ్, రాజస్థాన్, గుజరాత్ తదితర తొమ్మిది రాష్ట్రాల్లోని మొత్తం కేసుల్లో 84% ఎస్.సి. కులాలపైన మోపబడినవే. బీజేపీ పాలిత రాష్ట్రాల్లో 'లవ్ జిహాద్' పేరుతో చేస్తున్న చట్టాలు కింది కులాల యువకులు పై కులాల యువతులను ప్రేమించి పెళ్లి చేసుకోకుండా నిషేధించడం కోసమే. తెలుగు రాష్ట్రాల్లో పై కులాల అమ్మాయిలను ప్రేమించి పెళ్లి చేసుకొన్న నిమ్న కులాల యువకులను హత్యలు చేస్తున్న విషయం తెలిసిందే. 2019 లో దేశంలో సగటున రోజుకి 88 చొప్పున మహిళలపై మానభంగాలు జరిగినట్లు ఎన్సీఆర్బీనే ప్రకటించింది. చిన్న అమ్మాయిలను కూడా సామూహికంగా బలాత్కరించి చంపేయడం జరుగుతోంది. ఇవన్నీ శాంతి భద్రతలకు సంబంధించిన సమస్యలే కాదు. దళితులు, మహిళలు, బలహీన వర్గాల వారిని అనుభవించవచ్చు, అణిచివేయవచ్చు, హత్యలు చేయవచ్చని మనుస్మృతిలోనే వున్నది. అది భారతీయ సమాజంలో అగ్ర కులాల్లోని అత్యధికుల్లో ఆవహించి వుంది. అలాంటి అహంభావాన్ని అంతం చేయడం కోసమే మనుస్మృతి దహన కార్యక్రమాన్ని విస్తృతంగా పెద్ద ఎత్తున నిర్వహించాలి. ఇది దళితులకు సంబంధించిన కర్తవ్యమే కాదు... మహిళలు, మైనారిటీలు, బలహీన వర్గాలు, కులాలతో నిమిత్తం లేకుండా అభ్యుదయ కాముకులు అందరి కర్తవ్యంగా గుర్తించాలి. 

- నాగటి నారాయణ, సామాజిక విద్యావేత్త 9490300577

Uncertain on Schools Reopen

 బడి గంటలు మోగే వేళ?

                                   నాగటి నారాయణ 

       అక్టోబర్ 15 నుండి పాఠశాలలు, కళాశాలలను తెరవొచ్చని కేంద్ర ప్రభుత్వం అన్లాక్ గైడ్లైన్సు 5.0 ద్వారా రాష్ట్ర ప్రభుత్వాలకు అనుమతి యిచ్చింది. షరతులు వర్తిస్తాయని కూడా చెప్పింది. కోవిడ్-19 ప్రోటోకాల్ నిబంధనలకు తోడు కేంద్ర విద్యాశాఖ యిచ్చిన స్టాండర్డ్ ఆపరేటింగ్ ప్రొసీజర్సు (ఎస్ఓపీ)తో పాటు రాష్ట్ర ప్రభుత్వాలు కూడా అవసరమైన నిబంధనలు నిర్ణయించుకుని నిర్వహించుకోవాలని సూచించింది. తమ పిల్లలను స్వచ్చందంగానే బడికి పంపుతున్నట్లు, ఒకవేళ కరోనా సోకినా ఎవరినీ బాధ్యులను చేయమని పేరెంట్సు అంగీకార పత్రాలు యివ్వాలనే నిబంధన విధిగా పాటించాలని హెచ్చరించింది. రెండు నెలల తర్వాత డిసెంబర్ మధ్య నాటికి పరిస్థితిని పరిశీలిస్తే ఆంధ్ర ప్రదేశ్, అరుణాచల్ ప్రదేశ్, అస్సాం, గోవా, మహారాష్ట్ర, మేఘాలయ, మిజోరాం, నాగాలాండ్, పంజాబ్, సిక్కిం, త్రిపుర, ఉత్తరాఖండ్ మరియు ఉత్తర ప్రదేశ్ 13 రాష్ట్రాల్లోనే పాఠశాలలను పాక్షికంగా తెరిచినట్లు, విద్యార్థుల హాజరు చాలా పరిమితంగా (సగటున 10-30 శాతం) వున్నట్లు  తెలుస్తోంది. మిగిలిన రాష్ట్రాలు చర్చోపచర్చలతో మల్లగుల్లాలు పడుతున్నవి. తెలంగాణ కూడా అదే విధంగా శోచాయిస్తోంది. కర్ణాటకలో ఇంజనీరింగ్ కాలేజీల్లోనే విద్యార్థుల హాజరు ఐదు శాతం మాత్రమే వున్నందున పాఠశాలల పునఃప్రారంభం విషయాన్ని డిసెంబర్ మొదటి వారంలో పరిశీలిద్దామని ఆ రాష్ట్ర ముఖ్యమంత్రి బి.ఎస్.ఎడ్యూరప్ప చెప్పారు. హర్యానాలో 9-12 తరగతులను డిసెంబర్ 21 నుండి ప్రారంభించాలని, కోవిడ్ నెగెటివ్ టెస్ట్ రిపోర్ట్ తెచ్చిన విద్యార్థుల వరకే అనుమతించాలని ఆ రాష్ట్ర ప్రభుత్వం యిచ్చిన ఓక సర్కులర్ ద్వారా తెలిసింది. ప్రైవేట్ పాఠశాలల యాజమాన్య సంఘాల వత్తిడి మేరకు డిసెంబర్ 15 నుండి పాఠశాలలు తెరిచేందుకు మధ్యప్రదేశ్ ప్రభుత్వం అనుమతించింది. వ్యాక్సిన్ అందుబాటులోకి వచ్చే వరకు పాఠశాలలు ప్రారంభించేది లేదని ఢిల్లీ రాష్ట్ర విద్యాశాఖ మంత్రి మనీష్ సిసోడియా ప్రకటించారు. కరోనా వ్యాధి తగ్గేదాకా బడి తలుపులు తెరిచేది లేదని పశ్చిమ బెంగాల్ విద్యాశాఖ మంత్రి పార్ధ ఛటర్జీ చెప్పారు. డిసెంబర్ నెలాఖరు వరకు విద్యాసంస్థలు పని చేసే అవకాశం లేదని రాజస్థాన్, హిమాచల్ ప్రదేశ్ రాష్ట్రాలు ప్రకటించాయి. డిసెంబర్ రెండో వారం నుండి బడి తలుపులు తెరుస్తామని గతంలో ప్రకటించిన తెలంగాణ రాష్ట్ర పాఠశాల విద్య సంచాలకులు ఏ. శ్రీదేవసేన, ముఖ్యమంత్రి కేసీఆర్ అనుమతి కోసం వేచియున్నామని చెప్పినట్లు పత్రికల ద్వారా అందిన సమాచారం. 

             డిజిటల్ డివిజనుగా సరికొత్త అసమానత 

       పాఠశాలల్లో భౌతికంగా విద్యాబోధన జరిగే అవకాశం లేకపోవడంతో ఆన్లైన్ క్లాసుల ట్రెండ్ వచ్చేసింది. దానితో పాఠశాల విద్యలో నెలకొన్న అనేక అసమానతలకు తోడు డిజిటల్ డివిజన్ సరికొత్త సమస్యగా తలెత్తింది. ఈ విభజన ప్రభుత్వ ప్రైవేట్ పాఠశాలల మధ్య అసమానతకే పరిమితం కాకుండా ప్రైవేట్ పాఠశాలల మధ్య, వాటిలోని విద్యార్థుల మధ్య కూడా అసమానతకు దారి తీసింది. కొన్ని కార్పొరేట్ స్కూల్సు మరియు సీబీఎస్ఈ అనుబంధ పాఠశాలలు మాత్రమే ఆన్లైన్ క్లాసులు నిర్వహించినవి. అవి కూడా ఫీజులు చెల్లించిన విద్యార్థులకు మాత్రమే ఆన్లైన్ క్లాసులతో నేర్చుకొనే అనుమతి యిచ్చినవి. తక్కువ ఫీజులు తీసుకొనే బడ్జెట్ పాఠశాలలు రికార్డ్ చేసిన పాఠాలను సోషల్ మీడియా ద్వారా అందించినవి తప్ప ఆన్లైనులో లైవ్ క్లాసులు నిర్వహించలేకపోయినవి. కేంద్ర ప్రభుత్వ నిర్వహణలోని సకల సౌకర్యాలు, డిజిటల్ బోధనలో శిక్షణ పొందిన ఉపాధ్యాయులు గల కేంద్రీయ, నవోదయ విద్యాలయాలు ఏదో ఒక మేరకు ఆన్లైన్ క్లాసులు నిర్వహించినవి. రాష్ట్ర ప్రభుత్వ పాఠశాలల్లోని విద్యార్థులకు దక్కింది టీవీ పాఠాలు మరియు కొంతమంది హైస్కూల్ విద్యార్థులకు వాట్సాప్ సందేశాలు మాత్రమే. వాటిని కూడా బడుగు బలహీన వర్గాల విద్యార్థులు అందుకోలేక పోయారనే విషయం తెలిసిందే. మరోవైపు పీజీలు కట్టే స్తోమతు లేని ప్రైవేట్ స్కూళ్ల విద్యార్థులు మానసికంగా నలిగిపోయారు. మొత్తమ్మీద డిజిటల్ లెర్ణింగ్, ఆన్లైన్ క్లాసులు, వాట్సాప్ పాఠాలు ద్వారా 30% మంది విద్యార్థులు మాత్రమే ఎంతోకొంత నేర్చుకున్నారని 'యాన్వల్ స్టేటస్ ఆఫ్ ఎడ్యుకేషన్ రిపోర్ట్ (అసెర్)' ద్వారా తెలిసింది. అవన్నీ కాలక్షేప కార్యక్రమాలే తప్ప వాటితోనే సిలబస్ పూర్తయినట్లు పరిగణించే అవకాశం లేదు. అందువలన ఏడు నెలల కాలం గడిచినా 2020-21 విద్యా సంవత్సరం అనిశ్చిత స్థితిలోనే కొట్టుమిట్టాడుతోంది. 

            ప్రభుత్వ నిర్లక్ష్యం ప్రధాన లోపం 

       పాఠశాల విద్యను అందించాల్సిన బాధ్యత కేంద్ర, రాష్ట్ర ప్రభుత్వాలది. కోవిడ్ ప్రోటోకాల్ నిబంధనలు మరియు ఎస్ఓపీ లను పాటిస్తూ, బడి తలుపులు తెరిచి "ఏమీ ఫర్వాలేదు, పిల్లలను పంపండి, కరోనా సోకితే ప్రభుత్వమే వైద్యం చేయిస్తుంది" అనే భరోసా యివ్వగలిగితే తల్లిదండ్రులు స్పందించగలరు. కరోనా విపత్తులో తగిన జాగ్రత్తలతో పాఠశాలలు నిర్వహించాలంటే ఒక్కో విద్యార్థి నుండి అదనంగా ఐదు వందల రూపాయలు చొప్పున ఫీజు వసూలు చేయాల్సి వస్తుందని ప్రైవేట్ విద్యా సంస్థల యాజమాన్యాలు గతంలోనే ప్రకటించినవి. ధర్మల్ స్క్రీనింగ్, శానిటేషన్, సోషల్ డిస్టెన్సు, మంచి నీరు, మధ్యాహ్న భోజనం, కోవిడ్ టెస్టులు వగైరా అవసరాలకు తగిన నిధులు యివ్వకుండా ప్రభుత్వ పాఠశాలలు నిర్వహించడం చాలా కష్టం. ఒకవేళ జనవరి రెండో వారం నుండైనా పాఠశాలలను పునఃప్రారంభిస్తే విద్యా సంవత్సరం ఎప్పటికి ముగిస్తారనే విషయాన్ని ప్రభుత్వం ప్రకటించాలి. ఈ ప్రత్యేక పరిస్థితిలో 220 రోజులు నడిపించలేకపోయినా, అందులో సగం రోజులైనా అదనపు పని గంటలతో నిర్వహించి, కొంత సిలబస్ తగ్గించుకొని విద్యా సంవత్సరాన్ని రీషెడ్యూల్ చేయవచ్చు. ఈసారి విద్యా సంవత్సరం ముగింపు మరియు పదో తరగతి పరీక్షల నిర్వహణ విషయాలను రాష్ట్రాలు కేంద్రంతో కూడా సమన్వయం చేసుకోవాల్సిన అవసరం వున్నది. సీబీఎస్ఈ పదో తరగతి మరియు పన్నెండో తరగతి పరీక్షలను మార్చిలోనే నిర్వహించడానికి షెడ్యూల్ యివ్వబోతున్నట్లు తెలుస్తోంది. ఆ పరిస్థితిలో పదో తరగతి పబ్లిక్ పరీక్షను మార్చిలో కాకపోతే మీ నెలలో అయినా నిర్వహించేందుకు అనువుగా క్లాసులు నిర్వహించాలి. సిలబసుతో పాటు పరీక్ష పత్రాలను కూడా తగ్గించాలి. 1-9 తరగతులకు వేసవి సెలవులు లేకుండా జూలై వరకు తరగతులు నిర్వహించి విద్యా సంవత్సరాన్ని భర్తీ చేయవచ్చు.  @ 

నాగటి నారాయణ, సామాజిక విద్యావేత్త 6460300577

Joint Actions required for PRC